2 Tawarikh 4
Nagaragai duka tu inan pemalaran tambaga; duangpulo siku lambe’na, duangpulo siku pampangna na sangpulo siku langka’na.
Sia nagaragai tu tasik dipati’no’ sangka’ tangngana dio mai randan sangbali sae lako randan sangbalinna sangpulo siku, malepong tongan, iatu langka’na limangsiku, iatu ulang pesuka’ tallungpulo siku ma’din dileburanni.
Dio randan diongna lu dipatikui rapang-rapang sapi, untikui mintu’i, sangpulo siku, ullilingi tu anggenna tasik iato, dipaduang borong, tu sangpati’noranri.
Iate tasik toppo’ dao sangpulo dua sapi, tallu mentingo rekke, tallu mentingo rokko matampu’, tallu mentingo sau’ na tallu mentingo tama matallo; na iatu tasik iato toppo’mo dao, na iatu mintu’ palongko’na lu tama nasang.
Iatu makambanna tu tasik iato sangpala’ na iatu garaganna randanna susito baba irusan, ten to bunga leli tiballa’ na iatu alanna tallungsa’bu ba’.
Nagaragai tu pembasean sangpulo, lima napadio rampe kananna, lima dio kairinna, tu dinii ma’base. Iatu mintu’ oongan dipake umpemalaran pemala’ ditunu pu’pu’, nabasei tau lan, apa iatu tasik nanii mintu’ to minaa membase.
Nagaragai duka tu tongkonan palita bulaan sangpulo susitu dipasananni, anna palanni bilik maindan, lima dio rampe kanan, lima dio rampe kairi.
Nagaragai dukapa tu meda sangpulo, napalanni bilik maindan, lima dio rampe kanan na lima dio rampe kairi. Sia nagaragai tu pindan pa’pi’pikan bulaan saratu’.
Nagaragaipi tu tarampak to minaa, tu tarampak kalua’ sia ba’ba lu tama tarampak; sia iatu ba’ba rapi’ iato nasapu’ tambaga.
Iatu tasik napadio rampe kananna banua, ma’palusau’ lu tama-tama matallo.
Nagaragai duka Huram tu mintu’ kurin, pesodok sia pindan pa’pi’pikan. Susimoto tu Huram ussundunni mintu’ pengkarangan tu nagaragan datu Salomo lan banuanNa Puang Matua iamotu:
da’dua lentong, gasing-gasing, da’dua parande daona lu lentong iato, da’dua dalla’ ussamboi tu da’dua gasing-gasing parande daona lu lentong iato;
sia a’pa’ratu’ pa’bua dalima la dipalakoanni tu da’dua dalla’, duang tibang pa’bua dalima, ke misa’oi dalla’, la ussamboi tu da’dua gasing-gasing parande daona lu lentong iato.
Nagaragai tu tangdan sia pembasean dao kareta,
sia iatu misa’ tasik na sangpulo dua sapi tu nanii toppo’ dao.
Sia iatu kurin sia pesodok sia petossok sola mintu’ oonganna, tambaga dipapandillak-dillak nagaragai Huram-Abi, tu napopegaraga datu Salomo la dipake lan banuanNa PUANG.
Napati’no’mi datu tu oongan iato, dibo’bokan pa’pati’noran mandalan dio Padang lili’na Yordan, dio kasiallaranna Sukot na Zereda.
Mesua Salomo unggaragai tu mintu’ oongan lendu’ budanna, naurunganni tang dikemba’mo tu timbanganna.
Sia nagaragai duka Salomo tu mintu’ oongan, tu dipake lan banuanNa Puang Matua, iamotu inan pemalaran bulaan sia meda tu dipannii roti dipennoloan dao,
sia tongkonan palita sola mintu’ palitanna, tu la dipadukku dio tingayo bilik dio boko’, susitu dipasanna; iatu mintu’nato bulaan massang digaraga,
sia iatu bunga tiballa’, palita sia pesipi’ bulaan digaraga, iamotu bulaan massang tongan.
Iatu piso sia pindan pa’pi’pikan sia piring sia peruayan, bulaan massang digaraga; iatu diolanna tama banua, iamotu ba’ba rapi’ lanna lu, tu lu tama bilik tarru’ maindan, sia iatu ba’ba rapi’ tu lu tama bilik kalua’na Banua Kabusungan, bulaan digaraga.